ॲानलाईन पेमेंटमुळे  पिक पॅाकिटिंगचे  गुन्हे शून्यावर 

पुणे : शहरातील रेल्वे स्टेशन, एसटी स्टॅन्ड, बस थांबे एवढेच नाहीतर सार्वजनिक गर्दीच्या ठिकाणी पिक पॅाकेटिंगचे गुन्हे हमखास घडणार हे सांगायला भविष्यवेत्त्याची गरज नसायची. मात्र ॲानलाईन ट्राजेक्शन, ॲानलाईन पेमेंटमुळे अनेकजण पैशांचे पाकिट वापरतच नाही. तर अनेकजण रोख रकम बाळगत नाहीत. त्यामुळे पाकिट मारीचे ( पिक पॅाकेटिंगचे) गुन्हे शहरातील अनेक पोलीस ठाण्यात शून्यावर आले आहेत. तर काही पोलीस ठाण्यात अगदी नगण्य गुन्ह्यांची नोंद झाली आहे

पोलीस उपायुक्त परिमंडळ चार मधील चतुःश्रृंगी, विश्रांतवाडी, येरवडा, विमानतळ, चंदननगर आणि लोणीकंद पोलीस अशा सहा ठाण्याच्या हद्दीत गेल्या वर्षभरात एकही पाकिटमारीचा ( पिक पॅाकिटींगचा) गुन्हा दाखल झाला नाही. तर खडकी पोलीस ठाणाच्या हद्दीत अवघे तीनच पिक पॅाकिटिंगचे गुन्हे दाखल आहे. पुणे शहरातील अनेक पोलीस ठाण्यातील हीच स्थिती आहे. त्यामुळे एका बाजुला ॲानलाईन चे सायबर गुन्ह्यांत वाढ होत असताना परंपरागत काही गुन्हे कालबाह्य होत आहेत.

देशभरात ॲानलाईन ट्रान्जेक्शन किंवा ॲानलाईन पेमेंटमुळे अनेकजण कॅश जवळ बाळगत नाहीत. त्यामुळे पैशांचे पाकिट वापरण्यापेक्षा डिजीटल व्हालेट वापरण्यावर भर आहे. पेटीएम, गुगल पे, फोनपे किंवा युपीआय च्या माध्यमातून खरेदी व विक्री मोठ्या प्रमाणात होत आहे. त्यामुळे कॅशची गरज भासतच नाही. त्यामुळे अनेकांच्या खिशात पैसे नसले तरी मोबाईलच्या माध्यमातून सर्व ॲानलाईन व्यवहार होताना दिसतात. याचा परिणाम पिक पॅाकिटिंगचे गुन्हे शून्यावर आले असल्याचे दिसते.

एका बाजुला काही गुन्हे शून्यावर आले असले तरी सायबर क्राईम सारखे गुन्हे झपाट्याने वाढलेले दिसतात. ॲानलाईन फ्राड, एटीएम पीनच्या माध्यमातून कोट्यावधी रुपयांचे ट्रान्जेक्शन सायबर गुन्हेगार करताना दिसतात. त्यामुळे अशा वाढलेल्या गुन्हेगारीवर नियंत्रण ठेवणे पोलीसांसमोर मोठे आव्हान असल्याचे दिसते. त्यासाठी प्रत्येक पोलीस ठाण्यात सायबर सेल करण्यात आले आहे. सायबर सेल प्रत्येक पोलीस ठाण्यातील स्वतंत्र गुन्ह्यांचा तपास करते. त्यामुळे पोलीस ठाण्यातील काही गुन्ह्याचा आलेख कमी झाले असल्याचे दिसत असले तरी काही गुन्ह्यांचा आलेख वाढलेला दिसत आहे त्यामुळे नागरिकानी समाधान वाटून घेण्याचे काही कारण नाही.